नेपाली हास्यव्यङ्ग्य अनलाइन पत्रिका

रामशरण न्यौपाने :

जहाँ जाऊ जस्तो मनुजसित नै प्रेमले जोड नाता
जता जाँदा हेर्दा जडित छ शिला धाममा छैन धाता
उनैले खोलेको घट घट यहाँ जिन्दगीको छ खाता
पिता माताभन्दा अवनि बिचमा छैन अर्को विधाता॥१

यिनैले हुर्काए विकल चिचिलो प्रेमले नै सिँगारी
यिनै हुन् धर्तीमा हर पल दिने ओत लाग्ने छहारी
यिनैभन्दा अर्को सकल नरको को छ सामर्थ दाता ?
पिता माताभन्दा अवनि बिचमा छैन अर्को विधाता॥२

फुटाई चट्टनै सकल गहरा उर्वरा झन् बनाए
जुटाए मौकामा घर जमिन त्यो स्वर्णबस्ती बसाए
गुणी ज्ञानी छोरो किन पर परै हुन्छ छोडेर हाता ?
पिता माताभन्दा अवनि बिचमा छैन अर्को विधाता॥३

सजाए आस्थाले अनवरत नै सृष्टिको फूलबारी
बसे पुर्खा हाम्रा बहुत बलले देश सिङ्गो सिँगारी
यिनैको मायाको ऋण छ तनमा हेर ढड्डा र खाता
पिता माताभन्दा अवनि बिचमा छैन अर्को विधाता॥४

यिनैको छातीमा अटल छ सधैँ दिव्य नेपाल माता
यिनै जागे लागे खल असुर नै खैँचिदै कस्न पाता
पिता होला घाती न खुद जननी बन्न सक्छिन् कुमाता
पिता माताभन्दा अवनि बिचमा छैन अर्को विधाता॥५

०००
भक्तपुर