नेपाली हास्यव्यङ्ग्य अनलाइन पत्रिका

राजेन्द्रकुमार बज्राचार्य :

माया होस् अब देशभित्र जनको, बाँच्ने कला साथमा ।
वृद्धाको अपमान हैन सबले, माया गरोस् गाथमा ॥
बुझ्दै जीवन आज मानव यहाँ, होस् धारणा सार्थक ।
वृद्धाको प्रति धारणा मनुजमा, छोडोस् सकारात्मक ॥१॥

मीठाे भोजन वृद्धको सुदिन होस्,आहार होस् स्वादिलो ।
न्यानो आसन बासको रहर जो, होस् घाम त्यो पारिलो ॥
ती सन्तान रहे सबै वरपरै, वृद्धा बुवा पालक ।
वृद्धाको प्रति धारणा मनुजमा, छोडोस् सकारात्मक ॥२॥

छोराको अब प्रेम होस् अवनिमा, साथै बुहारी पनि ।
छोराको त पिता रहे भुवनमा, मानोस् बुहारी पनि ॥
माता पुत्र यहाँ रहे अवनिमा, ठानोस् त्यसै चालक ।
वृद्धाको प्रति धारणा मनुजमा, छोडोस् सकारात्मक ॥३॥

माया नाति र नातिनी प्रति रहे, बाबा र आमा भनी ।
मायाजाल रहे अनेक मनमा, संसार छाया बनी ॥
मायाको सुखदुःख बुझ्नु सबले, मान्दैन यो याचक ।
वृद्धाको प्रति धारणा मनुजमा, छोडोस् सकारात्मक ॥ ४॥

बाबा ईश्वर साथमा भुवनका, आमा रहिन् ईश्वरी ।
माया सार्थक माथमा रहरका, राखून् जसै पोखरी ॥
पीडा रेचक होस् हियो स्वजनमा, पाओस् दुवैले सक ।
वृद्धाको प्रति धारणा मनुजमा, छोडोस् सकारात्मक ॥५॥

०००
काठमाडाैं