नेपाली हास्यव्यङ्ग्य अनलाइन पत्रिका

राजेन्द्रकुमार बज्राचार्य :

वृद्धाको सब योगदान मनमा, राखोस् युवा वर्गले ।
सम्झोस् दुःख अतीत कर्म उनका, सन्मान होस् गर्वले ॥
होस् कर्तव्य यहाँ सदैव मनमा, दायित्व ठानी सक ।
वृद्धाको प्रति धारणा मनुजमा, छोडोस् सकारात्मक ॥ ४७॥

जो कर्तव्य सदा गरोस् सहजले, सन्तानले एक त्यो ।
आमाबावु सदा रहन्न जगमा, निर्बाधले सोच जो ॥
जे जे गर्नुछ धेर सेवक भई, होस् जिन्दगी सार्थक ।
वृद्धाको प्रति धारणा मनुजमा, छोडोस् सकारात्मक ॥४८॥

बोली नम्र रहोस् सदा स्वजनमा, माता पिता देवता ।
चिन्ता पीर नहोस् सदैव तिनमा, माया गरी सर्वथा ॥
दुख्दा चित्त कदापि हुन्न शुभ त्यो, लेओस् न आज्ञा धक ।
वृद्धाको प्रति धारणा मनुजमा, छोडोस् सकारात्मक ॥४९॥

मायाले दिनु खानपान रसिलो, जानेर सारा धन ।
छायामा बस मातृ पितृ विभुको, लाएर पूरा मन ॥
आर्जेको धन दुःखकष्ट सब ती, सम्झेर त्यो द्योतक ।
वृद्धाको प्रति धारणा मनुजमा, छोडोस् सकारात्मक ॥ ५०॥

०००
काठमाडाैं