नेपाली हास्यव्यङ्ग्य अनलाइन पत्रिका

श्रीप्रसाद पोखरेल :

“कता हिँड्यौ श्रीधर ?” असीको दशकका दामले मुरलीधरले प्रश्न गरे ।
“रङ्गशाला हिँडेको नि ।” मुरलीधरलाई जवाफ फर्काए ।

“के छ नि आज रङ्गशालामा ?“ उनले गोडा खोच्याउदै जिज्ञासालाई बढाए ।
नगरपालिकाले जेष्ठ नागरिकहरूलाई सक्रिय गराउन र मानसिक रोगबाट मुक्त गराउन राखेको कार्यक्रममा सहभागीहुन हिँडेका श्रीधरले भने “आज दौड प्रतियोगिता छ । भागलिन हिँडेको ।”

“यो उमेरमा दौड प्रतियोगिता ?” मुरलीधरले ओठ लेप्रियाए ।
“तिमीले सुनेका छौ ? डाँडाघरे आमैले नातिनीसँग बसेर एस इ इ परिक्षा दिइन् । कुन देशका हुन् कोनी सत्तरी वर्षका पर्यटकले सगरमाथा शिखर चढे अरे । तिमी पनि हिँड बरू दौडमा सहभागिता जनाऊ, आँट नभए दर्शक त बन्न सक्छौ नि ?” भन्दै श्रीधर अगाडी बढे ।

मुरलीधरले व्यङ्ग्य गर्दै भने “मर्ने बेलामा हरियो काँक्रो ।“
श्रीधरले पनि जोसिलो भएर जवाफ फर्काए “कुकुरलाई घिउ पच्दैन भन्थे हो रहेछ ।”

०००
इटहरी, सुनसरी