नेपाली हास्यव्यङ्ग्य अनलाइन पत्रिका

रमेशचन्द्र घिमिरे :

कालो कालो अनुहार गोरो बनाउँछु
च्याउरिएको गालामा पाउडर खन्याउँछु

मक्ख पर्दै हाँस्ने हो केलाई रुने हो
हिरोनीझैँ म पनि राम्री हुने हो
आँखा च्याती कोशमा गाजल लाउँछु
पर्ख एकछिन पियारा भेट्न आउँछु

स्यानो स्यानो बाटुलो ऐना हेर्छु है
एक छिनपछि निस्किन्छु लुगा फेर्छु है
पाएँ भने नक्कली दाँत टाँस्ने हो
मीठो हाँसो हाँसेर माया गाँस्ने हो

कुर्थामाथि लाउने हो सल बेरेर
आफै दङ्ग पर्नेछौ मलाई हेरेर
पहेँलपुरे सुनका चुरा टल्काउँछु
हाँसको तालमा लचक्क जिउ ढल्काउँछु

काइँयो खोजी गुन्द्रुके लट्टा फोरेर
चमेली तेल घसेर कपाल कोरेर
चिरिच्याट्ट नपरी त्यसै आइँदैन
हाम्रो पनि मनै हो हेप्न पाइँदैन ।

०००
लमजुङ