नेपाली हास्यव्यङ्ग्य अनलाइन पत्रिका

जगदीश्वर पाेखरेल :

लोभ र पाप बढे नरको मनमा
पर्दछ दृष्टि सदा परको धनमा
झूट अनेक चढ्यो पदको मदको
नायक बान्धवमा झगडा पदको ।।१

मानव जीवनले किन घात पियो
आखिर घाट पुगीकन जल्छ हियो
कौरव पाण्डवको झगडा ननिको
आर्थिक आर्जनमा झगडा पदको ।।२

शुद्ध रहेन नदी मलमूत्र थलो
दास विदेश पुगे सरकार ढल्यो
शान्ति मिलेन कसै जब घात बढ्यो
दुस्मन मित्र बने झगडा पदको ।।३

छैन विकास नयाँ अब दूर भयो
देश सखाप भयो छलछाम बढ्यो
हुन्छ सदा झगडा दल-मादलको
घात बढ्यो दलमा झगडा पदको ।।४

एक बनौँ जनता अब देश बचोस्
दुस्मनको मनमा अतिवाद हटोस्
त्रास सदैव हटोस् तनको मनको
घात अनेक रचे झगडा पदको ।।५

०००
पाउँदी, लमजुङ । हाल- कलङ्की, काठमाडाैं