नेपाली हास्यव्यङ्ग्य अनलाइन पत्रिका

रामशरण न्यौपाने :

आमाको ममता मिले हृदयको पीडा सबै भाग्दछ
चौतारी बिचको ठुलो पिपलको छाया सरी लाग्दछ
आमा छेउ हुँदा समस्त जनको फुर्किन्छ साह्रै मन
आमा नै नभए उजाड घरको के हुन्छ शोभा भन ॥१

फुल्दा फूल सुवासिला विपिनमा फैलाउँछन् बासना
साराको मन खिच्छ रङ्ग रसले शोभा बढाई घना
रङ्गी फूल सुवासदार नफुले के काम त्यो नन्दन
आमा नै नभए उजाड घरको के हुन्छ शोभा भन ॥२

द्यौता मन्दिरमा छँदा मनुजको देखिन्छ लर्को जहाँ
पूजा पाठ र धूप दीप सहितै नेवेद्य चढ्छन् त्यहाँ
द्यौता नै नपुजी लगाउन परे के काम त्यो चन्दन
आमा नै नभए उजाड घरको के हुन्छ शोभा भन ॥३

आमामा रिस राग हुन्न कहिल्यै सन्तानका खातिर
बच्चाका सुख शान्तिकै विषयमा गर्छन् सधैँ नै पिर
पीडाले दिन रात घुम्दछ अहो! नैराश्यमा जीवन
आमा नै नभए उजाड घरको के हुन्छ शोभा भन ॥४

आमा जो जसका बहार वयमै बेयाममा मर्दछन्
मायाको घर भत्किएर बहुतै सन्तापमा पर्दछन्
राख्दा तस्बिर एक ठिङ्ग घरमा रेटिन्छ भित्रीमन
आमा नै नभए उजाड घरको के हुन्छ शोभा भन ॥५

माताको प्रिय हातबाट न कुनै भेटिन्छ खाना मिठो
कोठामा न हतारको समयमा पाइन्छ नाना छिटो
खानी हुन् जननी दया र करुणा वात्सल्यले शोभन
आमा नै नभए उजाड घरको के हुन्छ शोभा भन ॥६

०००
भक्तपुर