नेपाली हास्यव्यङ्ग्य अनलाइन पत्रिका

मेघराज पाैड्याल :

छन् वृद्ध मात्र घर गोठ समस्त पाल्ने
खेती गरेर अझ बोझ ठुलो उचाल्ने
सङ्कष्ट साथ अनि शैशव पाल्नु पर्ने
खोक्रा जहान सबको मुख टाल्नुपर्ने।।१।।

ऊर्जा हुँदैन र मुढो पनि ढाल्नु पर्ने
खोजेर ढोड दिशिमा नित बाल्नुपर्ने
खट्छिन् बुढासँग बुढी पनि सुस्त-सुस्त
रोगी छ देह कहिले नहुने दुरुस्त।।२।।

खेती अनाजतिर वानर पस्छ खान
देखिन्छ यो नजरले सकिँदैन जान
सारा अनाज छरपष्ट बनाइ खान्छ
छारष्ट पार्दछ सबै र बगाल जान्छ।।३।।

आत्मा डराउँछ सधैँ न सकिन्छ बार्न
हेर्छन् कठै ! नजरले सकिँदैन टार्न
बस्छिन् थुचुक्क बुढिया नसकेर कैले
सत्कर्म छन् हृदय भित्र झुकौँ सबैले।।४।।

सुस्ताउँदै सडकमा नित हिँड्नु पर्छ
जे जुर्छ खान जहिले मनमा ठहर्छ
सन्तुष्ट देह कमलो छ सधै विचार
छन् वृद्ध अग्रज सबै दिलका उदार।।५।।

०००
कञ्चनरूप- ७, आदर्शटोल, सप्तरी