नेपाली हास्यव्यङ्ग्य अनलाइन पत्रिका

मेघराज पौड्याल @- हात्तीवने :

फुटेर भाइ-भाइमा सुधार यो असम्भव
जुटेर मार्ग बन्दछन् विकास गर्न सम्भव
सिकाइ दिन्छ मित्रले यता बटार्न पाखुरा
प्रबन्ध बन्छ दुष्टको बसेर लिम्पियाधुरा।।

जलाइ दिन्छ देशका अभिन्न शुभ्र गौरव
चुसेर खान्छ देशका युवा लगेर पौरख
बिथोल्छ शान्ति देशको निमठ्न थाल्छ आँकुरा
बनाउँदै छ योजना बसेर लिम्पियाधुरा।।

यहीँ बसेर दुष्टले नियाल्छ नित्य टाकुरा
लुकेर बन्छ योजना चुहिन्न ती कुनै कुरा
म जुर्मुराउँदै उठी बटार्न सक्छु पाखुरा
र राष्ट्र गीत गाउँला बसेर लिम्पियाधुरा।।

जुरुक्क जोसले उठे लुरुक्क पर्छ दुस्मन
तथापि पस्रदै गयौ विदेश पाउ पक्रन
फुरुक्क पार्छ मित्रझैँ गरेर शुभ्र भाषण
सडान मिल्कने यता पठाइ दिन्छ रासन।।

मिचेर साँध फाँटको धरा भयो जलाशय
उठेन देशको युवा अनन्त हुन्छ संशय
सुवीर धीर भै उठे म सुर्कने छु पाखुरा
निदाउँदै छ मस्तले उठाउँ लिम्पियाधुरा।।

विलाप गर्छ सम्झिदै उता बसेर काँगडा
यता छ दुष्ट तड्पदै इलामको हराभरा
मिचेर साँध देशको बसेर गर्छ खै ! कुरा
निदाउँदै छ मस्तले उठाउँ लिम्पियाधुरा।।

०००
सप्तरी