नेपाली हास्यव्यङ्ग्य अनलाइन पत्रिका

मेघराज पौड्याल :

गाउँमा जन्मिए वृद्ध गाउँमै मर्नु पर्दछ
असीपार हुँदा देह बालबच्चा ठहर्दछ
पाहुँना घरमा आए नचिन्दा सोध्नु पर्दछ
सोधिएमा बुढो मान्छे कुनालीझैँ ठहर्दछ ॥१॥

छोरो जागिरमा बस्ने बुहारीसँगमा हुने
छोरी छिन् ज्वाँइका साथ बुढाले कपडा धुने
बुढी छिन् घरमा रोगी ओखतीले अघाउँछिन्
च्याँख्ला चामल नाङ्लोमा केलाउन सघाउँछिन् ॥२॥

बुढीले सुस्तरी घान ढिकीमा घान लाउँछिन्
धम्कीले सास रोकेर औषधालय धाउँछिन्
न छोरा हेर्दछन् आमा न छोरी हेर्न पाउँछन्
छिमेकी घरका मान्छे दुलोबाट चियाउँछन् ॥३॥

सुकेका चाउरे गाला दाँत छैनन् चपाउने
सल्लाह गर्छ छोराले बुढाबुढी धपाउने
पिसाब हातले थाम्यो दिसा खुस्केर झर्दछ
अनेकौँ बोझ छन् प्यावा आफैँले धुनुपर्दछ ॥४॥

युवाबस्था थियो पैले बालबच्चा उठाउँदा
पियारो गर्दथे सारा भोका नाङ्गा चुठाउँदा
सन्तति बस्दछन् टाढा आमा वृद्ध भएपछि
चित्र खिच्दै रुने छोरो बाबु स्वर्ग गएपछि ॥५॥

०००
रौतहट