नेपाली हास्यव्यङ्ग्य अनलाइन पत्रिका

दीनानाथ पोख्रेल :

मूलहीन चिज हुन्न धरामा।
उम्रिएर सँग बढ्छ गरामा ॥
वृद्धमूल सबका गर रक्षा ।
प्राप्त होस् विनयले गुणशिक्षा ॥०१॥

छेउमा बस गई अनि सोध ।
कर्म योग्य पथ हो हित रोज ॥
शब्द पस्क विनयीपन घोली ।
बाँड्दछन् हृदयका सुख खोली॥०२॥

फक्रँदा कुसुमले मन तान्छन् ।
पक्र अग्रजकला हितका छन् ॥
के दिए बल छँदा ? गम नित्य ।
कर्म योग्य छ बडो मन स्तुत्य॥०३॥

ज्येष्ठ छैन भव यो पनि छैन ।
मिल्न सक्छ कसरी सुख चैन ?
ज्येष्ठका डगर दृष्टि विशाल ।
बाँड प्रेम मनले बह फाल ॥०४॥

वृद्ध हुन्छ भव यो सब जान ।
पुग्छु त्यो गतिविषे खुद ठान ॥
खानपान मनको खुद देऊ ।
फिर्छ याम पछि ता सुख लेऊ ॥०५॥

होस गुम्दछ भनी मन लेऊ ।
उठ्न साहस निको बल देऊ ॥
ओखती समयमा पनि देऊ ।
वृद्ध आसिक टिपी सुख लेऊ ॥०६॥

०००
इलाम, हाल भक्तपुर