नेपाली हास्यव्यङ्ग्य अनलाइन पत्रिका

दीनानाथ पोख्रेल :

मान्छे बन्ने समाऊँ गुणपथ युगको दुष्ट डर्छन् थलामै ।
फल्नेछन् प्राप्ति उम्दा रसमय घरका अन्नबाली खलामै ॥
वैरी उद्भ्रान्ति फ्याँकूँ सुखमय घर यो बन्छ उम्दा बिचारी।
बाबाआमा रमाऊन् हरदिन घरमा मिल्छ उल्लास भारी ॥८६॥

सङ्लो बाटो खुलेको टुकुटुकु म हिँडूँ मिल्छ सायुज्य धार ।
भत्कन्छन् कष्ट भर्ने रिपु हितपथका कर्मका दुष्ट बार ॥
फ्याँकूँ उद्भ्रान्ति जम्मै सुखमय घर यो बन्छ चिन्ता लघारी ॥
बाबाआमा रमाऊन् हरदिन घरमा मिल्छ उल्लास भारी ॥८७॥

चिन्ता हो चेत खाने धरमर मन यो पार्छ वाधा खिपेर ।
मिल्दै लम्केर बढ्दा कमसल बबुरो भाग्छ बाटो टिपेर॥
हिँड्दै सद्भ्रान्ति बाटो सुखमय बटुलूँ प्राप्ति थप्दै सिँगारी।
बाबाआमा रमाऊन् हरदिन घरमा मिल्छ उल्लास भारी ॥८८॥

ढाँट्ने छल्ने कुकर्मी क्षणिक मुलुकमा चम्कियोस् हट्छ चाँडो ।
फोस्रो पोख्ला उचाल्दै प्रवचन त्यसले बन्छ झर्के कुभाँडो ॥
ठग्छन् मान्छे फुटाई मनन जन गरून् खस्छ उठ्दैन फेरि ।
बाबाआमा रमाऊन् हरदिन घरमा मिल्छ उल्लास भारी ॥८९॥

सोझा आदर्श पोख्छन् तर सब बहमा झेल्दछन् कष्ट डेडी ।
जम्मै जग्गा उडाई विकल मनुजका लुट्छ त्यस्तै घडेरी ॥
अप्ठ्यारो मोड आए वरपर सबले साथ दिन्छन् बिचारी ।
बाबाआमा रमाऊन् हरदिन घरमा मिल्छ उल्लास भारी ॥९०॥

०००
सुम्बेक, इलाम