नेपाली हास्यव्यङ्ग्य अनलाइन पत्रिका

ढाकामोहन बराल :

मानिसहरूको भिडभाड ,
ध्वजापताकाले
सजिएको परिवेश,
फूलहरूका मालाहरू,
अबिर, केसरी र चन्दन ,
वैद्धिक मन्त्रोच्चारणको
ध्वनि,
जलधाराले नुहाइरहेका
शिव
र
एक आवृत्ति
सकिएको रुद्रीपाठ
आहा !
रमणीय छ
आँगन ।
पाहुनाको बाक्लो
उपस्थिति,
राष्ट्र बैङ्कका
नयाँ नोट,
डालाभरिका सेल,
थैलाभरिका फलफूल,
घ्यूमा मोलिएका चरु
चढ्न ठिक परिएको तुला
र जोख्न राखिएका
सिक्काहरू
सबै तयारी छ ।
आध्यात्मिक रहर र
भौतिकवादी चिन्तन
बोकेर
खुशी मनका साथ
यज्ञ मण्डपमा
बसेका उनको
ओठको मुस्कानले
फर्काइरहेको छ
अभिवादनका प्रतिउत्तरहरू ।
उनीहरू आउछन्
तर सम्झाउन
चाहन्नन् विगत
उनैले भनेर
टुप्पी काटेको,
जनै फालेको,
मन्दिर भत्काएको,
बाबाले पढ्दै गरेको
वेद जलाएको,
तीर्थ जान हिँडेका बालाई
फर्काएको,
बाले पूजा गर्ने
शालिग्रामलाई
घुएँत्रोमा राखेर
मिल्काएको,
आमाले झुण्ड्याएको
राम तस्विर मिल्काएको ।
आखिर रहर नै त हो
सबैलाई लाग्न सक्छ
त्यसैले
चुपचाप छन् उनीहरू,
सभ्य छन्
आगन्तुकहरू ।
प्रत्येक अध्यायको
अन्त्यमा
हरि नाम जप्छन्
अन्यसँगै मिलेर
स्वरमा स्वर मिलाएर
किनकि आज कमरेडको
चौरासी पूजा छ ।

०००
पोखरा, कास्की ।