नेपाली हास्यव्यङ्ग्य अनलाइन पत्रिका

देवीप्रसाद मिश्र

(सासूबुहारी)

छ नाता जमेकाे बुहारी र सासू
सदा एकता हाेस् नझारेर आँसु
मुमा साथ छाेरीहरू जाे समान
बुहारी र सासू मिलून् एकथान।।३८९।।

यताकी पियारी रमा एक छाेरी
हुने हुन् उताका थलाकी बुहारी
बुहारी हुँदै खुड्किलाे उक्लिएर
बलाे थाम्नु पर्ने छ सासू भएर।।३९०।।

र छाेरी बुहारी दुवै एक मानाैँ
बुहारी कसैले पराया नठानाैँ
पुरानो समस्या थलामा विचित्र
छ हेर्दा लुकेको अझै भित्रभित्र।।३९१।।

दुवै छन् गृहाध्यक्ष बन्ने कलामा
छ याे द्वन्द सासू बुहारीहरूमा
नपुग्ने लिँदैछन् सदाचार इच्छा
दुवैका कता पूर्ण हाेलान् सदिच्छा।।३९२।।

नखाेजी दुवैले कुनै सानमान
समालेर राखून् सफा स्वाभिमान
कलाकारझैँ भावनाका जुहारी
नखेलून् गरी तर्क सासू बुहारी।।३९३।।

बुहारीहरूकाे यसै मामिलामा
बढी हुन्छ दायित्व सासूहरूमा
भरे भन्दछ्न् छे मुखाले अरूले
गरून् याद राम्रो बुहारीहरूले।।३९४।।

छ सासूहरूले अझै बुझ्नुपर्ने
सिकाएर संस्कारले दक्ष पार्ने
बुहारी पराया भनी नेत्र तर्दा
भरे लाग्छ सम्भावनाभित्र पर्दा।।३९५।।

( क्रमशः)

०००
२०८०/४/१३