नेपाली हास्यव्यङ्ग्य अनलाइन पत्रिका

रामशरण न्यौपाने :

विधाता बाबुआमा हुन् सबैले चाल यो पाउन्
उनैको चाकडी गर्दै खुसीको रङ्ग बर्साउन्
छ गाथा वीर पुर्खाको फिँजाई बेसरी गाउन्
उनैको मार्गमा हिँड्दै गृहस्थी लक्ष पछ्याउन्॥१

बिरामी छन् कतै बाबा बिरामी नै बुढी आमा
छ जानै स्वास्थ्यचौकीमा परेको बेसरी धामा
पुर्‍याउन् भाइ छोराले तुरुन्तै लौन मौकामा
न होस् है आँसुकोवर्षा कसैको वृद्ध आँखामा॥२

अनेकौँ रोगले गाल्छन् झनै पाको बुढ्यौलीमा
सबैलाई छ झन् खाँचो सहाराको बुढ्यौलीमा
बलेको हुन्छ चिन्ताको ठुलो राँको बुढ्यौलीमा
बनुन् है पुत्र पुत्री नै दुवै आँखो बुढ्यौलीमा॥३

बगेको प्रेमको गङ्गा हियोमा हुन्छ हो जाती
सधैँ कल्याण चाहन्छन् सबै सन्तानको माथि
तिनैको लाग्छ हो आशिष् तिनैको प्रेरणा भाँती
नराखुन् द्वेष पाकामा बनाई बज्र झैँ छाती॥४

सबैमा प्रेम फैलाओस् सधैँ छाओस् खुसीयाली
गृहस्थी झाँगियोस् राम्रो बनुन् सत्कर्मका माली
न हुन् हेला कतै कोही फुलोस् त्यो प्रेमको डाली
बुढा बच्चा युवा सङ्गै पियून् पीयूषको थाली॥५

०००
भक्तपुर