नेपाली हास्यव्यङ्ग्य अनलाइन पत्रिका

भावना न्याैपाने :

रित्तो सडकमा हमर लिएर ढुंगा कुट्दैछु म
हातमा ठेला पेटमा भोक
अनि बुढो शरीर लिएर।

कुनै बेला मेरो पनि समय थियो
बाल्यकालमा यसले किन खाइन भनेर
सोध्ने बाबा आमा
अनि उनीहरुको निस्वार्थ
प्रेम थियो।

तर आज म छोरा छोरी भएर पनि
एक्लो छु नितान्त एक्लो बुढो
शरिर भए पनि भोक त लाग्दो रहेछ
म मरि मरि ढुंगा कुट्दैछु।

बाटोमा आउँने जानेले आमा भनेर बोलाउँछन्
म आफूसँग केही
पीडा नभए जस्तै गरि हाँसि दिन्छु
रोएर पनि के गर्नु आफ्नो भाग्य
आफैंसँग हुँदोरहेछ।

लाग्थ्यो बुढेसकालमा छोरा छोरीको
साथ र माया पाउँनेछु
छोरा छोरी सबैले साथ मेरो छोडिदिए।

कुप्रो शरिर काँपिरहेका यी हातले
ढुंगा कुट्दा त झन् प्राणनै ज्याला
जस्तो रातभरि हात दुखेर सुत्न सक्दिनँ म।

तेल लगाउँछु आगोमा सेकाउँछु
फेरि भोलि बिहान त ढुंगा कुट्न
जानै पर्याे आफ्नो जीवन धान्नै पर्यो।

बेला बेलामा मेरा छोराछोरीहरुलाई सँम्झन्छु
आँसुका धारा बगाउँछु
आँसुको धारा बगाएर मात्रै के गर्नु
बाँच्नै पर्ने रहेछ
फेरि आफ्नो काममा लाग्दछु।

०००
भक्तपुर