नेपाली हास्यव्यङ्ग्य अनलाइन पत्रिका

दीनानाथ पोख्रेल :

पानीमा घाम पर्दा झलमल भव यो खुल्छ पस्केर मोती।
छायामा हुन्न सङ्लो दृग खुद पथमा दृश्यमा दिव्य ज्योति ।।
हुन् आमाबाबु आफ्ना दिनकर टकझैं मात्र आफू विचारी ।
बाबाआमा रमाऊन् हरदिन घरमा मिल्छ उल्लास भारी ।।७६।।

सङ्लो हुन् भाव भङ्गी मृदुमय रसले पूर्ण पारी म पस्कूँ ।
चिन्ता सन्ताप बढ्छन् खुद मन म लिऊँ दिक्क मानी नठस्कूँ ।।
ऊर्जा जागोस् हियामा गतिविधि रसका पोख्न जानूँ फिँजारी ।
बाबाआमा रमाऊन् हरदिन घरमा मिल्छ उल्लास भारी ।।७७।।

नाफाका कर्म जे छन् विनय स्वर खिपी पस्कँदा योग्य हुन्छ ।
बग्छन् हर्षाश्रुधारा प्रगति गति टिपी चेतले शैल छुन्छ।।
झर्के दुर्छे कुबानी सुखरिपु सम हुन् पेल जम्मै लतारी ।
बाबाआमा रमाऊन् हरदिन घरमा मिल्छ उल्लास भारी ।।७८।।

यौटा सङ्लो सुबाटो हितमय युगको पस्क सायुज्य हार ।
मिल्छन् सत्प्राप्ति ऊर्जा हितमय दिलमा जन्मको खुल्छ सार ।।
गर्दै गानाबजाना मनुजमन उठून् पस्क ऊर्जा उमारी ।
बाबाआमा रमाऊन् हरदिन घरमा मिल्छ उल्लास भारी ।।७९।।

चम्कन्छन् नित्य तारा गगनतल भरी चम्क सत्कर्म पक्री ।
खुल्नेछन् हर्ष ढोका मनसुख बटुली साधना उठ्छ फक्री।।
ईर्ष्याडाहा म फ्याँकूँ सकस दिल रुने खिन्नता दूर पारी ।
बाबाआमा रमाऊन् हरदिन घरमा मिल्छ उल्लास भारी ।। ८०।।

०००
सुम्बेक, इलाम नगरपालिका वडा नं ०२, इलाम