नेपाली हास्यव्यङ्ग्य अनलाइन पत्रिका

दीनानाथ पोख्रेल :

खुल्नेछन् भाव सङ्ला युगलय कृतका चेत उठ्नेछ माथि।
पक्रूँ सत्कर्म उम्दा सब जनमनको गर्वले फुल्छ छाती।।
सद्गामी मार्ग लागूँ हित कृत म छरूँ साधनाले सिंगारी ।
बाबाआमा रमाऊन् हरदिन घरमा मिल्छ उल्लास भारी ।।८१ ।।

अग्लो डाँडो रमाई युगलय बटुली बाँड्छ सौन्दर्य हार ।
सिक्नै पर्नेछ मैले युग गुण हितको जोड्न सायुज्य तार ।।
फ्याँकूँ जम्मै नराम्रा अहित पथ सबै कृत्य सङ्ला सकारी।
बाबाआमा रमाऊन् हरदिन घरमा मिल्छ उल्लास भारी ।।८२ ।।

जुट्दा उत्साह बढ्छन् जनमन सबमा प्राप्तिको खुल्छ ढोका ।
फुट्दा उत्साह मर्छन् कृत पथ हितका भोग्दछन् नित्य धोका ।।
यस्तो सद्ज्ञान बोकी शुभकृत म टिपूँ कर्मशोभा फिँजारी ।
बाबाआमा रमाऊन् हरदिन घरमा मिल्छ उल्लास भारी ।।८३।।

खुल्नेछन् दिव्य ढोका श्रमपथ म बढे प्राप्तिका हार लाग्छन् ।
इच्छा औदार्य मार्गी युगगुण बटुली कर्मका कृत्य ताक्छन् ।।
डुल्दै संसार खोजूँ हितपथ युगको कर्म आँखा उघारी ।
बाबाआमा रमाऊन् हरदिन घरमा मिल्छ उल्लास भारी ।।८४।।

आफ्ना सन्तान हाँसून् श्रमफल बटुली वृद्ध बोक्छन् हियामा ।
अग्ला संस्कार आफ्ना जतन जन गरून् मिल्छ ऊर्जा हियामा ।।
सङ्ला आशा जमाई परिजन हितका खोज्दछन् फूलबारी ।
बाबाआमा रमाऊन् हरदिन घरमा मिल्छ उल्लास भारी ।।८५ ।।

क्रमश:

०००
इलाम नगरपालिका वडा नं. ०२, इलाम