नेपाली हास्यव्यङ्ग्य अनलाइन पत्रिका

घनश्याम रेग्मी :

सृष्टि चलायो नयन खुलायो
ममता भरिको काख दिलायो
सन्तति पाउँछ रम्य बिहान
वृद्ध सबै हुन् ईश समान ।।१

पसिना धारा तर्तर पारी
नित्य खनेका खेत र बारी
सन्ततिलाई सुविधा सान
वृद्ध सबै हुन् ईश समान ।।२

श्रमको जगमा महल उठायो
बटुली पतकर नीड बनायो
पूर्ण जुटायो कपडा थान
वृद्ध सबै हुन् ईश समान ।।३

वरपर खोजी कनिका दाना
पूर्ण गरायो घरमा खाना
लोभ बिनाको जीवन यान
वृद्ध सबै हुन् ईश समान ।।४

शीतल बानी शान्त मिजास
समय समयमा वचन मिठास
हित चिन्तकमा गर सब मान
वृद्ध सबै हुन् ईश समान ।।५

अनुभव साझा हितकर सोच
सृजन कलाका अनुपम खोज
हर्दम गर्छन् श्री हरि गान
वृद्ध सबै हुन् ईश समान ।।६

०००
विकास चोक ५, भरतपुर, चितवन