नेपाली हास्यव्यङ्ग्य अनलाइन पत्रिका

घनश्याम रेग्मी :

संसार यो बुझेका पाका विशेष हुन्छन्
अज्ञान चिर्न आँखा शिक्षा अमोघ दिन्छन्
आदर्श जेष्ठ पुस्ता सल्लाह दिन्छ राम्रो
सम्मान वृद्ध पुस्ता दायित्व हुन्छ हाम्रो ।।१

आफू सहेर पीडा सन्तानमा खुसीको
नौला उमार्छ बेर्ना आनन्दमा बुकीको
बाटो हिँडेर लामो गन्तव्य पार्छ राम्रो
सम्मान वृद्ध पुस्ता दायित्व हुन्छ हाम्रो ।।२

भोगेर नै सिकेका शिक्षा प्रभावकारी
भन्थे अनाज लक्ष्मी राख्नू भरी भकारी
आदर्श मार्ग हिँड्दा लोभी भनून् कि दाम्रो
सम्मान वृद्ध पुस्ता दायित्व हुन्छ हाम्रो ।।३

कस्तो रिवाज चल्ने के के हुनेछ भोलि
भन्छन् अगाडि जम्मै विस्तार पूर्ण खोली
थामे स्वधर्म आफ्नो कर्तव्य युक्त राम्रो
सम्मान वृद्ध पुस्ता दायित्व हुन्छ हाम्रो ।।४

भोको नराख कोही मोही मकै खुवाऊ
माटो खनेर खोस्री केही त्यहाँ लगाऊ
संस्कार युक्त हामी देख्ने विचार राम्रो
सम्मान वृद्ध पुस्ता दायित्व हुन्छ हाम्रो ।।५

यात्रा अभाव जित्ने गन्तव्यमा हिँडेका
मोहान्ध भाव चिर्दै धर्मार्थ जो खटेका
उद्यान आज हाम्रो पारे लरक्क राम्रो
सम्मान वृद्ध पुस्ता दायित्व हुन्छ हाम्रो ।।६

०००
भरतपुर ५, नारायणपुर, चितवन