नेपाली हास्यव्यङ्ग्य अनलाइन पत्रिका

रामशरण न्यौपाने :

बुबा र आमा लिएर साथै मिलेर लेखौँ नयाँ कहानी
सुकर्ममा नै डटेर लागौँ सधैँ उदाओस् नयाँ बिहानी
धरा सिँगारी सुरम्य पारौँ र स्वेद हाम्रो यतै खसाऔँ
नबिर्स हाम्रो परम्परा यो बुबा र आमा सधैँ हसाऔँ॥१

छ उर्वरा यो धरा अनौठो हुँदैन बाली र बोट खाली
जताततै नै हराभरा छन् फले फुलेका अनेक डाली
गरेर खेती यसै धरामा स्वआय मात्रै मिलेर खाऔँ
नबिर्स हाम्रो परम्परा यो बुबा र आमा सधैँ हसाऔँ॥२

छ रीत हाम्रो अपार राम्रो जहान सारा मिलेर बस्ने
ठुला बडा नै विशेष मान्ने पुजेर आदर्श भित्र पस्ने
धरेर आस्था गरेर मायाँ लिई स्वयम् काँधमा नचाऔँ
नबिर्स हाम्रो परम्परा यो बुबा र आमा सधैँ हसाऔँ॥३

सजीव बोल्ने खुदा यिनै हुन् बुझेर सेवा गरौँ यिनैको
गरेर श्रद्धा उनेर माला गला सजाऔँ भरौँ यिनैको
बनी पुजारी यिनै खुदाको छ धेर कर्जा सबै चुकाऔँ
नबिर्स हाम्रो परम्परा यो बुबा र आमा सधैँ हसाऔँ॥४

बुबा मुमा हुन् सदा उज्याला प्रभा दिने घाम जूनजस्ता
रमेर हाँसून् अनन्त बाँचून् छरेर बास्ना प्रसूनजस्ता
स्वजन्मदाता चिनी विधाता हियार भित्रै सजौँ सजाऔँ
नबिर्स हाम्रो परम्परा यो बुबा र आमा सधैँ हसाऔँ॥५

नवीन पुस्ता छ बढ्न बाँकी सबै कुरामा यहाँ अगाडि
युवा जगत् नै छ आज हाम्रो फसीरहेको खुबै पछाडि
दिएर टेवा गरेर सेवा गृहस्थ राम्रो दिगो बसाऔँ
नबिर्स हाम्रो परम्परा यो बुबा र आमा सधैँ हसाऔँ॥६

०००
भक्तपुर