नेपाली हास्यव्यङ्ग्य अनलाइन पत्रिका

कृष्णप्रसाद पौडेल `जस्ताघरे´:

आमा बा हाम्रा शिरउपरका श्रेष्ठका ईशझैँ हुन्।
अग्ला अग्ला ती हिमशिखरझैँ टाकुराझैँँ उँचा छन् ।।
बद्री वा काशी पवन थलमा जान पाऊँ नपाऊँ।
आमाबाबाका शुभवचनले यो जगत् जित्न पाऊ ।।-१

बाबा हुन् हाम्रा भव सरहका मातृ हुन् देवयानी ।
हाँस्दै वा नाच्दै यस अवनिमा बित्छ यो जिन्दगानी ।।
उम्दा अर्तीकाअति असलका बात छन् सुन्न पाऊँ ।
आमाबाबाका शुभवचनले यो जगत् जित्न पाऊँ ।।-२

माता धर्ती हुन् सुन मनुज हो हुन् बुबा दैव पुज्ने।
छोरा छोरीका विविधजनका हुन् बडा मार्ग कोर्ने ।।
आशिष् वा माया अझ अमर होस् भन्न हाँसेर पाऊँ ।
आमाबाबाका शुभवचनले यो जगत् जित्न पाऊँ ।।-३

पाकाका राम्रा अनुभवहरू झन् अनौठा कथा छन् ।
आफ्ना प्यारामा अनुज सबमा प्रेमका शृङ्खला छन् ।।
सोझा ती हाम्रा यस मुलुकका वृद्ध वृद्धा हसाऊँ ।
आमाबाबाका शुभवचनले यो जगत् जित्न पाऊँ ।।-४

बाबा माताका दिल मगजमा देवको बास हुन्छ ।
साह्रै अप्ठ्यारो क्षण कहरको सङ्कटा दूर भाग्छ।।
चारै सीमामा मगमग हुने शान्तिको दीप बालूँ।
आमाबाबाका शुभवचनले यो जगत् जित्न पाऊँ ।।-५

०००
बट्टार, नुवाकोट । हाल: माछापोखरी, काठमाडौँ ।