नेपाली हास्यव्यङ्ग्य अनलाइन पत्रिका

भीम राना जिज्ञासु :

१. विडम्बना
भनेर होइन गरेर देखाउनेको विचारले पो छुन्छ
जो जति महान् हुन्छ ऊ सबैको सामु नुहुन्छ
तर विडम्बना ! धनबहादुरसँग धन नभएजस्तै
जलस्रोतको धनी देश तर यहीं बढी लोडसेडिङ हुन्छ ।

२. आग्रह
जसले गरे पनि आजकल देश “बन्द” हुन्छ
यसलाई लोकतन्त्रको खास आचरणभन्दा हुन्छ
देशमा के के न होला भनेर फुर्कनु पनि व्यर्थै
त्यसैले जति सक्दो चाँडो शासनलाई “गणतन्त्र” मान्दा हुन्छ ।

३. नेता संस्कार
शासनको कुरा गर्दा लोकतन्त्र राम्रो हो भन्दा हुन्छ
नेताहरूको मति बिग्रिए त्यो तन्त्र पनि विस्तारै “गन्धा” हुन्छ
नेपाल माथि नउक्लनुमा मुख्यतया एउटै कारण छ-
जो कुर्चीमा पुग्छन् त्यसपछि ऊ “अन्धा” हुन्छ ।

४. दुर्भाग्य
देश ! कहिले हड्ताल, कहिले चक्काजाम
जुन तन्त्र आए पनि लागेन कहिल्यै पहारिलो घाम
छुल्याहा फटाहाको मात्र जताततै राज चल्दोरहेछ
विचरा सोझा जनताले कहिल्यै टेक्न पाएन गतिलो ठाम ! –

०००
पृथ्वीनारायण नगरपालिका-४, गोरखा हालः काठमाडौँ
मधुपर्क (२०६४)