नेपाली हास्यव्यङ्ग्य अनलाइन पत्रिका

रामशरण न्याैपाने :

बुधजन बिक्छन् देश भुलेका
पद धनतिर छन् धेर सुलेका
भ्रष्ट कपुतमा बुद्धि रचाऊ
पशुपति बाबा देश बचाऊ॥१

शोषण दोहन धेर छ अहिले
छैन भएको योबिधि पहिले
डस्छ हलाहल लौन अचाऊ
पशुपति बाबा देश बचाऊ॥२

परिवर्तनको नाटक खेले
जनताकन झन् बेसरी पेले
उत्तम नेता एक खटाऊ
पशुपति बाबा देश बचाऊ॥३

शठजन गर्छन् झुटको खेती
देश डुबेको लेश नचेती
शठ खललाई पेल पचाऊ
पशुपति बाबा देश बचाऊ॥४

जन्म गराऊ सक्षम नरको
दास नहोउन् कोही परको
पार हवस् यो ढलपल नाउ
पशुपति बाबा देश बचाऊ॥५

०००
रामशरण न्यौपाने, भक्तपुर