नेपाली हास्यव्यङ्ग्य अनलाइन पत्रिका

रामशरण न्यौपाने :

भावी बनी प्रारब्ध नै लेख्छन् यिनै सन्तानको
आडा दरो दिन्छन् सधैँ पारो चढाई ज्ञानको
माता पिता टाढा बसे बन्ला घरै सुक्खा मरु
सन्तान आफ्ना बिग्रिँदा रुन्छन् पिता माताहरू॥१

माया गरी त्यो काँधमा बोकी डुलाएकै थिए
ऊर्जा थपी त्यो देहमा लाली घुलाएकै थिए
पाएर आशिष् वृद्धकै बढ्ने गरोस् झन् आबरु
सन्तान आफ्ना बिग्रिँदा रुन्छन् पिता माताहरू॥२

परोस् झरी या घाम होस् बन्छन् उनै छाता बरु
सम्पन्न हुन् सन्तान ती भन्छन् नहुन् रित्ता तरु
माता पिता भन्दा ठुला छैनन् धाता नाता अरू
सन्तान आफ्ना बिग्रिँदा रुन्छन् पिता माताहरू॥३

खेती किसानीमा डटी बाले उनैले त्यो चुलो
हाँसो खुसी मात्रै दिने गर्दै इरादा झन् ठुलो
रक्षा गरी सन्तानको राख्छन् बनी योद्धा बरु
सन्तान आफ्ना बिग्रिँदा रुन्छन् पिता माताहरू॥४

आफ्नै धरा हो स्वर्ग यो सन्तानले सेवा गरून्
ऊर्जा यहीँ पोखून् सबै नेपालको माथा भरून्
आफ्ना सारा सन्तानमा गर्छन् माया धाताहरू
सन्तान आफ्ना बिग्रिँदा रुन्छन् पिता माताहरू॥५

०००
भक्तपुर