नेपाली हास्यव्यङ्ग्य अनलाइन पत्रिका

सुरेशकुमार पाण्डे :

किन बुझ्दैनौँ फलाम काट्ने पनि हतियार चाहिन्छ,
जस्तै दुश्मन्को गर्धन काट्नलाई तरवार चाहिन्छ।

यो सत्ताले मात्र भएर त कहाँ पुग्छ नेताहरूलाई,
सत्तामा बसिराख्न देशी विदेशी बफादार चाहिन्छ।

भन्छन् जम्मा पाँच हजार मारेँ तिम्रो रिसले पुग्यो ?
स्याबास संसार भरी देशमा यस्तै सरकार चाहिन्छ।

गरिब छलकपट गर्न सक्दैन बाँचेर केकाम बिचरा,
देशमा रोजगार छैन बाँच्नै पनि त आधार चाहिन्छ।

नागरिकहरूलाई काम भएन भन्छौ तिमी आफैले,
हामीले के खाने नेतालाई पनि त रोजगार चाहिन्छ।

ककसले दिन्छौ भन त भोट हामीलाई झुट नबोली,
यो त पोलेसी हो जित्नलाई पनि औजार चाहिन्छ।

सुन तस्कर, एनसेल घोटाला मात्र कहाँ गर्यौँ हामी,
कयौँ घोटाला भए लेख्न सक्ने अखबार चाहिन्छ।

०००
दाङ घोराही १८
०९-१२-२०२३,