नेपाली हास्यव्यङ्ग्य अनलाइन पत्रिका

रामशरण न्यौपाने “पाँचघरे” :

यो अङ्गभित्रै बल भीमको छ
छन् पाखुरीमा रज तेज जो छ
खानै परे अग्नि खलि सहन्छु
मेरो बुढ्यौली गहना म भन्छु॥१

सत्कर्ममा रम्छु प्रश्वेद झारी
नेपालको नै मुहुडा सिँगारी
गाथा सधैँ गौरवको कहन्छु
मेरो बुढ्यौली गहना म भन्छु॥२

छन् लक्ष मेरा पनि व्योम चुम्ने
खोज्दै महामानव विश्व घुम्ने
फाली बियाँ चामल त्यो निफन्छु
मेरो बुढ्यौली गहना म भन्छु॥३

पेसा भयो लिन्न म राजनीति
फसिन्छ भन्ने मनमा छ भीति
उत्कोच चन्दा नलिने म बन्छु
मेरो बुढ्यौली गहना म भन्छु॥४

बन्दै पुजारी म त देश पुज्ने
हो आर्तको बन्दछु दर्द बुझ्ने
झारेर तारा बरु जून गन्छु
मेरो बुढ्यौली गहना म भन्छु॥५

०००
चा. ना. पा. ३, दुबुलाँपू, भक्तपुर