नेपाली हास्यव्यङ्ग्य अनलाइन पत्रिका

जगदीश्वर पाेखरेल :

चिन्ता असाध्य लाग्ने आशा सबै हरायो ।
बन्दैन देश लुट्छन् साध्वी सराप लाग्यो ।।
आयो पवित्र बेला छानेर धूर्त फालौँ ।
वृद्धा र वृद्ध भन्छन् सोचेर भोट हालौँ ।।१

नेपाल राष्ट्र राम्रो गङ्गा हजार बग्छन् ।
घाती जितेर आए बेचेर देश सक्छन् ।।
राम्रा इमानदारी नेता बुझेर मानौँ ।
वृद्धा र वृद्ध भन्छन् सोचेर भोट हालौँ ।।२

उद्योग खोल्न सक्ने नेता चिनेर छान ।
विश्वास भाव राखे पर्दैन दूर जान ।।
नेपाल वासी प्यारा उत्साह जोस बालौँ ।
वृद्धा र वृद्ध भन्छन् सोचेर भोट हालौँ ।।३

नेपाल साँच्न सक्ने माया गरेर हाँक्ने ।
सद्भाव स्नेह गर्दै नेपाल काख राख्ने ।।
राम्रो विकास गर्ने विद्वान् चङ्ख छानौँ ।
वृद्धा र वृद्ध भन्छन् सोचेर भोट हालौँ ।।४

नेपाल जन्म धर्ती अग्लो हिमाल छानो ।
धर्ती विशाल हाम्रो नेपाल छैन सानो ।।
गम्भीर सोच राखी सुयोग्य व्यक्ति तानौँ ।
वृद्धा र वृद्ध भन्छन् सोचेर भोट हालौँ ।।५

०००
जगदीश्वर पाउँदीबजार, लमजुङ