नेपाली हास्यव्यङ्ग्य अनलाइन पत्रिका

रामशरण न्याैपाने :

नेपालमै खुद भयो गतिलो कमान
पर्दैन खोज्न यसको सहसा प्रमाण
सामर्थ्य प्रेषित भयो सुख शान्ति डाक्न
वृद्धाहरू सबल छन् अब राज्य हाँक्न॥१

सम्पन्न साबित भयो स्थिर काम हाम्रो
बन्ने छ यो मुलुक झन् खुद धाम राम्रो
पर्दैन वृद्ध र युवा पनि खट्न थाक्न
वृद्धाहरू सबल छन् अब राज्य हाँक्न॥२

खाई भरे उदर जो सब दूर बस्छन्
भोकाहरू सब चुलोतिर भित्र पस्छन्
लाग्दैन बेर पनि लौ प्रिय भोज पाक्न
वृद्धाहरू सबल छन् अब राज्य हाँक्न॥३

पस्दैन गाउँघरमा खल बाघ फेरि
चर्छन् सधैँ विपिनमा मृग दाउ हेरी
सक्छन् सिकारतिर यी खुद वाण ताक्न
वृद्धाहरू सबल छन् अब राज्य हाँक्न॥४

बन्दै छ कानुन यहाँ मजबुत धेर
आयो रिपोट अति नै गतिलो बनेर
सक्छन् चिनेर खुद नै खल भ्रष्ट जाक्न
वृद्धाहरू सबल छन् अब राज्य हाँक्न॥५

०००
भक्तपुर