नेपाली हास्यव्यङ्ग्य अनलाइन पत्रिका

चेवन बस्नेत ठूलाघरे :

१
हर्षले रमाउँदै, वसन्तको सवारमा
झुन्डिए गुराँसका, थुँगाहरू पहाडमा ।।
मौसमी रमाइलो, सुनाखरी झुलाउँदा ।
वृद्धमा खुसी फुलोस्, वसन्तले भुलाउँदा ।।

२
टोटलो र भोगटे, जताततै वनैभरि ।
फक्रिँदा पखेरीमा, खुसी हुने मनैभरि ।।
पातमा र बोटमा, सुधा स्वयम् रसाउँदा ।
वृद्धमा खुसी फुलोस्, वसन्तले भुलाउँदा ।।

३
नीलिमा निकुञ्जमा, कुनाकुनी जलाशय ।
टल्किएर टाकुरा, रमाउँदै हिमालय ।।
न्याउली मुनालका, सुनृत्य हेर्न पाउँदा ।
वृद्धमा खुसी फुलोस्, वसन्तले भुलाउँदा ।।

४
लट्टिँदै लता बुटा, मयूरका नचाइमा ।
झारपात उम्रिँदै, रमाउँदै वसन्तमा ।।
कोइली मिठासले, गला खिपेर गाउँदा ।
वृद्धमा खुसी फुलोस्, वसन्तले भुलाउँदा ।।

५
देखिँदा वसन्तमा, कतै झरी डुबाउने ।
झारपात झोपडी, बतासले उडाउने ।।
जोगिएर बागमा, बुढाबुढी खुदै हुँदा ।
वृद्धमा खुसी फुलोस्, वसन्तले भुलाउँदा ।।

०००
धर्मदेवी न.पा.९, पुपाँगु, सङ्खुवासभा