नेपाली हास्यव्यङ्ग्य अनलाइन पत्रिका

रूद्र ज्ञवाली :

१.
प्रकृतिले गर्भबाटै पिउने कला सिकाउँछ
फाटेको कपडाले सिउने कला सिकाउँछ
निरपेक्ष हुँदैन दुश्मनी पनि यत्ति सम्झनु
दुश्मनको प्रहारले जिउने कला सिकाउँछ ।

२.
अँध्यारोसङ्ग उनको छ उठबस के पारा हो
काम गर्ने एउटाले अर्कैलाई जस के पारा हो
चकाचौंध देखेर हुट्टिट्याउँहरूको यस्तो लाग्छ
जाँतोलाई भन्दा हातोलाई खसखस के पारा हो ।

३.
यो नठान्नुस् वेद पढ्दैमा कोही वेदान्ती हुन्छ
एक्लै साधनामा रमाउने मान्छे एकान्ती हुन्छ
जत्ति नै खन्याऊँ भर्दै भरिन्न तृष्णाको भकारी
जति धेरै तृष्णा त्यति नै मनमा अशान्ति हुन्छ ।

४.
कहिले डिस्को कहिले कत्थक तालमा हुन्छन्
कहिले भट्टीतिर कहिले जुवाको खालमा हुन्छन्
बास बदल्नु र गास बदल्नु धर्म हो चम्चाहरूको
कहिले प्लेटमा कहिले महाजनका थालमा हुन्छन् ।

०००
भैरहवा