नेपाली हास्यव्यङ्ग्य अनलाइन पत्रिका

चेवन बस्नेत ठूलाघरे :

गुणी यी बाआमा झटपट उठी छन् काममा बेसरी ।
जुटेका धन्दामा तनमन सबै सन्तान जप्तै हरि ।।
बुढा झन् आफैमा सबल घरका हुन् खोचका देवता ।
सबै पाका मान्छे अनुपम खुदा हुन् यो धराधामका ।।१।।

जमाना आशाका निशिदिन जुटे पारेर हल्का मन ।
पखाले पानीमा हरपल उतै माझेर सोझो पन ।।
यिनैका आशामा वरिपरि घुमेँ विश्वास आयामका ।
सबै पाका मान्छे अनुपम खुदा हुन् यो धराधामका ।।२।।

निसाना छातीका झटपट टुटे पर्दा कलेजी चिरा ।
टुटेनन् आकाङ्क्षा तर पनि सधैँ सम्झी पुराना हिरा ।।
बचाए सम्हाले पछिपछि हुने सङ्कष्टमा जीविका ।
सबै पाका मान्छे अनुपम खुदा हुन् यो धराधामका ।।३।।

पछार्दै गल्ती ती हरसमयमा ऊर्जा बटुल्दै खडा ।
गराए आफैमा विगत नभनी मान्छे बनाए कडा ।।
यही नै कोसेली मन र धनको पाका पुराना सखा ।
सबै पाका मान्छे अनुपम खुदा हुन् यो धराधामका ।।४।।

नसक्ने चिन्नै ती अबुझ मनुले देवी र द्यौताहरू ।
बुढापाका ज्ञानी हरसमयमा लाग्छन् सुबाटो बरु ।।
सिकाए देखाए तरुण मनका बास्ना सुगन्धी निका ।
सबै पाका मान्छे अनुपम खुदा हुन् यो धराधामका ।।५।।

०००
धर्मदेवी न.पा. ९, पुपाँगु, सङ्खुवासभा