नेपाली हास्यव्यङ्ग्य अनलाइन पत्रिका

चेवन बस्नेत ठूलाघरे :

छोड्यौ जन्म दलान आज सहजै, आयौ पराई घर ।
सम्हाल्दै घरका विचार परका, फेर्दै पुरानो थर ।।
आफ्नो सद्गुण शिल्प जे छ यिनमा, सुम्पेर आमा गनी ।
माता यी पतिकी मुमा सरह नै हुन् कर्मदाता पनि ।।१।।

तिम्रै हुन् सबथोक पोइ घरका, सन्तान नाताहरू ।
तिम्रै शासनमा रमाउन सकुन्, पाका बचेरा बरु ।।
देवी हुन् घरकी समाजतिरकी, भन्दै पुकारे अनि ।
माता यी पतिकी मुमा सरह नै हुन् कर्मदाता पनि ।।२।।

आफ्नो त्यो सबथोक जे छ तनमा, सन्तानका खातिर ।
गर्दै त्याग सधैँ पवित्र मनले, मान्दै नमानी पिर ।।
लाग्यौ सेवक झैँ मिलाउन सधै, आमा तिमी नन्दिनी ।
माता यी पतिकी मुमा सरह नै हुन् कर्मदाता पनि ।।३।।

आमा भन्न सदा तयार रहनू, बस्ती हवस् वा घर ।
सेवा होस् अति उच्चकोटि तहमा, मान्दै नमानी डर ।।
यस्तो कर्म गरे समाज घरमा, आहा सबैकी उनी ।
माता यी पतिकी मुमा सरह नै हुन् कर्मदाता पनि ।।४।।

आमा बाबु र भाइ नन्द ससुरा, सासू मिलेको घर ।
रम्दै बस्न सकुन् सदा हँसमुखी, पूरै रमाओस् घर ।।
यस्तो सौरभ बुन्दछिन् हरघडी, सासू र माता अनि ।
माता यी पतिकी मुमा सरह नै हुन् कर्मदाता पनि ।।५।।

०००
धर्मदेवी न.पा. ९, पुपाँगु, सङ्खुवासभा