नेपाली हास्यव्यङ्ग्य अनलाइन पत्रिका

घनश्याम रेग्मी :

१)
अहिंसा नै ठुलो धर्म मानेर बुद्धले भने
संसार प्रेमले बाँध्छ ठानेर बुद्धले भने
गल्ती हुन्छ नजानेर बुझेमा माग माग्दछ
माफ गर्ने ठुलो हुन्छ जानेर बुद्धले भने ।

२)
पिठ्युँ पछाडि अरूको कुरा हुनु राम्रो होइन
मुखमा राम राम बगलीमा छुरा हुनु राम्रो होइन
माया मोह जालो पन्छाएर मात्र बुद्ध बनिन्छ
नाडीमा लगाउँदा नबझ्ने चुरा हुनु राम्रो होइन ।

३)
धन वैभव र उमेर जे जति छन् ती अस्थिर हुन्छन्
दया माया करुणा र मानवीय भावना चिर हुन्छन्
बुद्धजस्तै त्यागी बन तिमी लोक हितमा लाग्ने भए
घमण्ड, लोभ र लालच सडक होइनन् भिर हुन्छन् ।

४)
संसार चिन्नु भन्दा पहिले आफूलाई को हो चिन्नुपर्छ
अरूलाई बाटो सिकाउने आफू सही बाटो हिँन्नुपर्छ
आआफ्ना विचारका धेरै थरी मान्छे छन् यो संसारमा
कुन बियाँ र कुन चामल हुन् काम लाग्ने चिनेर बिन्नुपर्छ ।

०००
भरतपुर ५, समी चोक, चितवन