नेपाली हास्यव्यङ्ग्य अनलाइन पत्रिका

चेवन बस्नेत ठूलाघरे :

सँगैका साथी ती, छोडिए खै कता छन् ।
मरेका जो जो छन्, सम्झना माथमा झन् ।।
यसैको पीडाले, चस्स घोच्दै छ कोखी ।
गरौँला भन्दैमा, थन्किए वृद्ध जोडी ।।१।।

न छोरा छोरी वा, वंशका साथमा छन् ।
न नाता आफन्ती, हेर्नलाई दगुर्छन् ।।
बसेका बाटोमा, देखिए जीर्ण रोगी ।
उनेका सिद्रा झैँ, देखिए वृद्ध जोडी ।।२।।

म चुम्थेँ गालामा, रातमा साथ मिल्दा ।
मुसार्थेँ कायामा, सूर्यको ताप चल्दा ।
थियो त्यो सम्झौतो, सम्झँदा झट्ट फेरी ।
भरोसा कुर्दै छन्, मार्गमा वृद्ध जोडी ।।३।।

अगुल्टे मेलामा, यौवनाको जुवारी ।
सँगैका साथीले, ल्याउँथे क्या बुहारी ।।
घडीका काँटा ती, रोकिए टक्क छोडी ।
दुखैले बाँचेका, छन् बरा वृद्ध जोडी ।।४।।

बिलौना पोखेको, सुन्न पर्दैन ठान्थेँ ।
कहानी लेखेको, देख्न पर्दैन मान्थेँ ।।
घडीले फेरायो, सास मेरो निचोरी ।
कठै यो धर्तीमा, घेरिँदै वृद्ध जोडी ।।५।।

०००
धर्मदेवी न.पा. ९, पुपाँगु, सङ्खुवासभा