नेपाली हास्यव्यङ्ग्य अनलाइन पत्रिका

दीनानाथ पोख्रेल :

चल्दैछ संसार विचार गर्नू ।
सद्‌ज्ञानले यो दिल पूर्ण भर्नू ॥
सम्झौँ सबैले हितका सिरान ।
होस् वृद्धबेला सुखको निसान ।।०१।।

छन् कृत्य उम्दा युगज्ञान भर्छन् ।
सन्ताप,सङ्‌कष्ट डटेर हर्छन् ।।
हुन् ज्ञान बाँड्‌ने गुणका बिहान ।
होस् वृद्धबेला सुखको निसान ।।०२।।

संसारको सार सबै खिचेर।
दिन्छन् सुबाटो सिपले सिँचेर ॥
हुन् वृद्ध ज्ञानी कृतका मुहान।
होस् वृद्धबेला सुखको निसान ।।०३।।

छन् कर्मबाधा सब दूर सार्छन् ।
शिल्पी कलाका भवमा उमार्छन् ॥
गर्छन् बिचारी पथको किटान ।
होस् वृद्धबेला सुखको निसान ।।०४।।

छन् लाख चिन्ता मनका कुनामा ।
के पुर्छ खाल्डो चिज होस् दुनामा ?
गर्छन् यिनैले जडको निदान ।
होस् वृद्धबेला सुखको निसान ।।०५।।

०००
सुम्बेक, इलाम