नेपाली हास्यव्यङ्ग्य अनलाइन पत्रिका

घनश्याम रेग्मी :

सन्तति फुर्सदमा नहुनाले
दूर कतै परदेश हुनाले
अस्थिर चिन्तित वृद्ध रहन्छन्
ज्येष्ठहरू अति कष्ट सहन्छन् ।१

दौलत वैभव पास रहेन
दौडिन शक्ति र तागत छैन
ताप चिसो पनि घात दिने छन्
ज्येष्ठहरू अति कष्ट सहन्छन् ।२

साधन इन्जिन तौर नयाँ छन्
भोजन सेवन आज नयाँ झन्
फाटकले पनि साथ दिँदैनन्
ज्येष्ठहरू अति कष्ट सहन्छन् ।३

पुस्तक लेखक फेरिन थाले
पाठक मान्दछ बोझिल खाले
अल्मल पर्दछ भाव कहाँ छन्
ज्येष्ठहरू अति कष्ट सहन्छन् ।४

वंश र अंश छ लोभ तिखार्ने
दौलत राक्षस मोह फिँजार्ने
ती सब जोर्न छ कर्म गरिन्छन्
ज्येष्ठहरू अति कष्ट सहन्छन् ।५

०००
चितवन