नेपाली हास्यव्यङ्ग्य अनलाइन पत्रिका

जुनू घिमिरे :

त्यो दीप हुन्छ तपमा बनिदिन्छ ज्योति
त्यस्तै प्रवीण मन त्यो सुकिलो छ कान्ति
छन् घामझैँ प्रखर ती प्रिय हुन्छ साथ
यी ज्येष्ठ नागरिकमा छ सदा प्रणाम ।१

बाटो हुँदैन सजिलो तर हाँसिदिन्छन् ।
त्यो वृद्ध जीवनसँगै मन साटिदिन्छन्
बग्छन् नदी सरह नै छ पवित्र काम
यी ज्येष्ठ नागरिकमा छ सदा प्रणाम ।२

भोगेर दु:ख सुख यी सहजै पचाए
छानो बनेर घरको पसिना बगाए
यस्ता विशिष्ट गुरुको छ कहाँ इनाम ?
यी ज्येष्ठ नागरिकमा छ सदा प्रणाम ।३

संस्कारका मधुर ती गुण पोखिदिन्छन्
सद्भावलेअमृतझैँ मृदु प्रेम गाँस्छन्
लाग्छन् अमूल्य निधि हुन् अनि पुण्य धाम,
यी ज्येष्ठ नागरिकमा छ सदा प्रणाम॥ ४

झुक्छन् फलेर फल ती निहुरिन्छ हाँगो
छन् ज्येष्ठ नै सबल जो प्रिय यो धराको
आफैँ छ वृद्ध रसिलो फलकै समान
यी ज्येष्ठ नागरिकमा छ सदा प्रणाम॥ ५

०००
दुवाकोट भक्तपुर