नेपाली हास्यव्यङ्ग्य अनलाइन पत्रिका

जुनू घिमिरे :

असार लाग्दा हलो र जुवा काँधमा बोकेर ।
किसान दाजु झर्दछन् बेँसी फुरुङ्ग परेर ।।
काँधमा भिर्छन् कोदालो अनि पटुकी कसेर ।
असारे भाका गाउँछन् पाका खेतमा झरेर ।।

हिलोमा गोरु नारेर हली अगाडि बढ्दछन् ।
लगाई आली रोपाइँ गर्न तयार पार्दछन् ।।
उखेल्छन् कोही हरियो बिउ टुसुक्क बसेर ।
असारे भाका गाउँछन् पाका खेतमा झरेर ।।

आकाशबाट बर्सिए पानी हाँस्दछन् रमाई ।
गर्दछन् काम किसानहरू खाई र नखाई ।।
रापिन्छ धेरै असारे घाम तैपनि भुलेर ।
असारे भाका गाउँछन् पाका खेतमा झरेर ।।

बाउसे अनि रोपारहरू हिलो मै डुब्दछन् ।
रोपेर मुट्ठी फल्दछ मानो विश्वास बोक्दछन् ।।
सुसेलीहरू गुन्जिछ मिठो स्वरमा मिलेर
असारे भाका गाउँछन् पाका खेतमा झरेर ।।

असार लाग्दा किसान गर्छन् काम जो बेसरी ।
मुसुक्क हाँस्छन् मङ्सिर लाग्दा भरिँदा भकारी ।।
सकेको काम गर्दछन् पाका मेलामा पुगेर ।
असारे भाका गाउँछन् पाका खेतमा झरेर ।।

०००
दुवाकोट, भक्तपुर