छिमेकीको प्रश्न
छिमेकी धेरै मौन बस्न सकेन । बोल्यो,"लौ अब भन कलाधर भाइ, आमा र प्यारी दुई मध्ये पहिले कसलाई जोगाउने ? भन, आमा कि पत्नी ?"
धनराज गिरी :
घरमा जहिले पनि कुरुक्षेत्र, सासू र बुहारीको लीला, दिक्क मान्यो कलाधरले र छिमेकीसित समस्या समाधानको उपाय खोज्यो। छिमिकीले उपाय बतायो, जङ्गलको बीचमा मिलन देवीको मन्दिर छ ! ती देवीको दर्शन गरेपछि जस्तो विवाद पनि मिल्छ। मैले पनि अनुभव गरेकोछु। म क्याम्पसप्रमुख भएको बेलामा मेरा दुई सहायक कत्ति पनि नमिल्ने,देवीको दर्शन गराएपछि “कृष्ण र हरि” जस्ता भए। मिले ।
छिमेकी केन्द्रनारायण परिधिले उपाय बताए । साइत जुराए । “म पनि जान्छु, बोर लागेको छ घरमा बस्दा बस्दा। ”
२०८० साल फागुन १३ गते लागे चारजना जङ्गलको बाटो, पैदल। बाटोमा अनेक गफ गरे । सासूबुहारी बोलेनन् । कलाधरले अति अनुरोध गरेर मात्र आएका । बीच जङ्गलमा पुगेपछि अचम्म भयो । धराप रहेछ। सासू र बुहारी खसे एउटा खाडलमा । खाडल जङ्गलको राजा बाघको गुफा पो रहेछ। बाघ मख्ख। भोको थियो।
छिमेकीले कलाधरलाई हेर्यो । ऊ ढुक्क । अनुहारमा कुनै भाव छैन। आत्तिएको पनि छैन। छिमेकी, मनमनै “दिक्क भएको रहेछ मोरो, गए जाऊन् भन्ने सोच्यो क्यारे !” छिमेकी धेरै मौन बस्न सकेन । बोल्यो,”लौ अब भन कलाधर भाइ, आमा र प्यारी दुई मध्ये पहिले कसलाई जोगाउने ? भन, आमा कि पत्नी ?”
मुस्कुरायो कलाधर। खाडलतिर हेर्यो। बाघ मौन छ, अझै,उत्तर दियो, “न आमा, न पत्नी, पहिले म बाघलाई जोगाउनेछु।”
आम्मै, हाई जम्प गरेर बाघ पो भाग्यो। बाघले आफ्नो जोगायो, कलाधरले सोच्यो। छिमेकी जिल्ल। सासूबुहारी हातेमालो गर्दै बाहिरिए। देवीको दर्शन गरे । फर्किए । कलाधरको निकेतनमा स्थायी शान्ति छायो ।
०००
चितवन