नेपाली हास्यव्यङ्ग्य अनलाइन पत्रिका

विनोद नेपाल :

दिनदिनै ‘पोजेटिभ’हरू फेला परेको र अस्पताल लगिएको खबर आइरहेको थियो । मानिसहरू के होला र कसो होलाको त्रासमा थिए ।
यसैबीच एकाविहानैै हल्ला फैलियो ‘टोलबाट पनि केहीलाई लगियो ।’
‘कहाँ ? कुन घरमा रैछन् ?’ – यसै त सधैँ कुराको खोजिमा रहनेहरू, अझ यत्ति थाहा पाएपछि के चाहियो ? स्वाभाविक थियो मानिसहरूले चासो राख्न थाले ।

थाहा पाउनेहरू भने औँलाले देखाउँदा औँलै झर्ला भन्ने डरले हो वा किन हो मुख बटारेर वा आँखाले त्यस घरतर्फ ईशारा गरिरहेका थिए ।
‘कतिजना लगेछ ?’ – एउटाले सोध्यो ?
‘५ जना रे ५ जना, थोरै हो र ?’- अर्कोले भन्यो ।
‘कस्ता असत्ती रैछन्, कसो लगेछ, नत्र त खत्तम पार्नेरैछन् नि, कहाँ कहाँ डुलेहोलान्, ककसलाई छोए होलान्’- केही बोले, धेरैले सहमति जनाए ।

धेरैले भयङ्कर त्रासबाट मुक्तिको लामो सास फेरे ।
केहीबेरमा टेलिभिजनमा खबर आयो – ‘… टोलबाट ५ जना जुवाडे नगद सहित खालबाटै पक्राउ’ ।

०००
पाल्पा । हाल काठमाडौं