प्रेस्क्रिप्शन नबुझ्दा
उनैले पढिन् र पर्समा राखिन् । घर जाउँ भनिन्, मेडिकल गइएन। उनी बाथरुम गएको बखत सुटुक्क पर्सबाट निकालेर प्रेस्क्रिप्शन हेरेको त DTBD को मतलब ‘डे टाइममा बोल्न दिनुहोस्” पो रहेछ।
तीर्थराज अधिकारी :
अति भो, यसरी रोग पालेर बस्न हुँदै हुँदैन, अहिलेको जमानामा । निन्द्रामा केके भन्ने हो केके ? केटाकेटीले पनि सोध्न थाले। हिँड जँचाउन डक्टर कोमा।
आफूलाई त खास केही भएजस्तो लाग्दैन । जान्न भनौं भने बोल्न दिने होइन । हुन्छ भनेँ, पछि लागेँ।
डक्टरलाई मैले केही भन्नै परेन । उनैले फर्माइन्।
म , उहाँसङ्ग एक्लै कुरा गर्छु । तपाईं एकछिन बाहिर जानु भए हुन्छ। डाक्टरले मसित धेरै कुरा सोधे । भए जति बेली बिस्तार लगाएँ।
साह्रै ठुलो समस्या रहेनछ भन्दै एउटा नुस्खा ( प्रेस्क्रिप्शन) उनैलाई थमाए, डक्टरले । धेरै चिनेका, नचिनेका मेडिकल हलमा पुगियो । कहीँ पाइएन औषधी। यो (DTBD) डि. टि. बि. डि. मेडिसिन त बाहिरबाट मगाउनु पर्छ भने । कसैले यस्तो दवाई याहँ पाउन सक्नुहुन्न पनि भने।
फर्केर गइयो डक्टरलाई भेट्न । यो औषधी त पाइएन डक्टर साहेब भन्न नपाउँदै खै त भनेर नुस्खा मागेर नेपालीमा लेखिदिए । उनैले पढिन् र पर्समा राखिन् । घर जाउँ भनिन्, मेडिकल गइएन।
उनी बाथरुम गएको बखत सुटुक्क पर्सबाट निकालेर प्रेस्क्रिप्शन हेरेको त DTBD को मतलब ‘डे टाइममा बोल्न दिनुहोस्” पो रहेछ।
०००
पोखरा-१०, हाल संयुक्त राज्य अमेरिका।