नेपाली हास्यव्यङ्ग्य अनलाइन पत्रिका

रमेशचन्द्र घिमिरे :

‘यी राम भनेका धोवीको कुरा सुनेर आफ्नी पत्नी सीतालाई गृहत्याग गर्न वाध्य गराउने अविवेकी पुरुषको नाम हो । धर्म निरपेक्षता जिन्दावाद !’

‘गोपिनीको रासलीलामा लिप्त हुने कृष्णलाई हामी देउता मान्छौँ । यो सब बकबास हो । धर्म निरपेक्षता जिन्दावाद !’
एकातिर धर्म निरपेक्षताको भाषण सुनेर मक्ख परेका र अर्कातिर के के न गर्छौँ भनेर भाषण ठोकेकालाई एकचोटि हेरौँ न भन्ने सोच भएकाहरूले दूधपोखरीमा खुसुखुसु पानी खन्याए र पानीपोखरी बनाएर सानदार मतले जिताए ।

हिजोका कुरा सबैले बिर्सिए । मतदाताले बिर्सिए । नेता स्वयम्ले समेत बिर्सिए ।
धार्मिक महायज्ञको उद्घाटनमा उनै नेता बोलाइए ।

‘राम भनेका क्रान्तिकारी र सत् पुरुष हुन् जसले रावण जस्तो आसुरी शक्तिका विरुद्ध आगो ओकले अनि रामराज्यको स्थापना गरे । क्रान्तिकारी कृष्णले कंश जस्तो दानवीय प्रवृत्तिलाई परास्त गरे र जनतालाई न्यायको प्रत्याभूति गराए ।’
नेताले भाषण ठोके, जनताहरूले ताली ठोके ।

०००
भोर्लेटार, लमजुङ