नेपाली हास्यव्यङ्ग्य अनलाइन पत्रिका

रमेश समर्थन :

बेला आउँछ पर्खिदैन कहिले, लौ लै अबेला भयो
सत्ता मात्र बचाउने मुलुकमा खाली झमेला भयो
यो देखी मुलुकै उठ्यो र नभमा नारा यही धन्कियो-
चाँडे खील निकाल लौ, सकस भो, ऐया ! पिलो टन्कियो !

चर्को घाम हुँदै गयो गगनमा धर्ती बल्यो दन्दनी
सत्ताका ढँटुवार गर्जन गरी घुम्छन् सधैँ फन्फनी
के दब्थे ? जनता जुटे सडकमा विद्रोह झन् चर्कियो
चाँडै खील निकाल लौ, सकस भो, ऐया ! पिलो टन्कियो !

पाकी पीप गनाउने डङडङी भो भित्रभित्रै अब
चिर्नै पर्छ भने चिरौँ अब छिटै, सड्ला शरीरै सब
ऑैस्याहा अब पर्न सक्छ सजिलै लौ लौ झिँगा भन्कियो
चाँडै खील निकाल लौ, सकस भो, ऐया ! पिलो टन्कियो !

बढ्दै घाउ गयो भने यसरी नै होला नि यो क्यान्सर
पीडा बढ्छ झनै सकिन्न पछि यो, चाँडै दबाई गर
गोलीका भरमा दबाउँछु भनी सन्की झनै सन्कियो
चाँडै खील निकाल लौ, सकस भो, ऐया ! पिलो टन्कियो !

आलो घाउ भए छिटै पनि हुने थ्यो औषधि यो तर
वर्षौंवर्ष बितेर आज यसरी भो घाउ झन् जब्बर
अत्यन्तै अब दुष्टले दुख दियो आगोसरी दन्कियो
चाँडै खील निकाल लौ, सकस भो, ऐया ! पिलो टन्कियो !

केही दुक्ख अवश्य हुन्छ पहिले पीलो निचोर्दा, तर
जे होला, अब यो निको हुनुपर्यो, शल्यक्रिया नै गर
भन्दै देश जुरूक्क नै उठिगयो, संसार नै रन्कियो
चाँडै खील निकाल लौ, सकस भो, ऐया ! पिलो टन्कियो !

०००
रुपन्देही