नेपाली हास्यव्यङ्ग्य अनलाइन पत्रिका

रामप्रसाद पन्थी :

हिजो महिना चैत्र भए पनि मेरा लागि असारको पन्ध्र थियो । कारण महिना फेर्नु थियो । वर्ष फेर्नु थियो । भित्तामा तुर्लुङ्ग झुन्डिएका पुराना क्यालेन्डरलाई सत्ताबाट हटाउनु पर्ने थियो । नयाँ क्यालेन्डरलाई सत्तामा पुर्‍याउनु थियो । भित्तामा सगौरव सजाउनु थियो ।

आउनेलाई स्वागत र जानेलाई विदाई गर्ने संस्कार पुरानै हो । स्वागत र विदाईमा हल्का जलपान स्वभाविक छ । यसर्थ केही साथीहरू मिलेर पुरानो वर्षलाई विदा गर्ने योजना तयार गरियो । होम स्टे जाने । हल्का लिने । नाँचगान गर्ने । त्यसै गरियो । रातको ११ः५९ मा असीलाई जोडतोडले विदाई गरियो । ठीक १२ः०० मा एकासीलाई स्वागत गरियो । खुसियालीमा कक्टेल हानियो । यो महोत्सवको माहोलमा रातभर रमाइलो गरियो । कतिखेर झुपुक्क भइयो थाहा भएन । उठ्दा खोल्सीमा उत्तानो टाङ लाएको पाइयो ।

बिहान आँखा मिच्दै मुख पखाल्न धारामा गएँ । ऐनामा आँखा पर्‍यो । अनुहार पुरानै थियो । अझ पुरानो देखियो । आँखाका डिलमा कचेरा देखिए । एकरङ्गी कालो कपाल बहुरङ्गी देखियो । गालाका छालामा मुजा परेछन् । लाग्यो नयाँ वर्षले मलाई धोका दियो । नयाँ वर्ष आउदा मलाई पुरानो बनाएको रहेछ ।

ऐनाबाट आँखा हटाएर हेरेँ । नयाँ वर्षमा सूर्य पश्चिमबाट उदाउला भन्ने अपेक्षा थियो । पूर्वबाटै उदायो । खोलाहरू माथितिर बगेको देखिएन । माछा उडेको हेर्ने रहर पूरा भएन । प्रकृति उस्तै थियो । फरक देखिएन ।

लाग्यो, प्रकृतिको नियम र मान्छेको नियम फरक छ । मान्छेको समाजमा नयाँको महत्व ज्यादा छ । जस्तो विवाह भएको सुरूसुरूमा जस्तो चाख र पारख पुरानो हुँदै गएपछि हुँदो रहेनछ । श्रीमान श्रीमती दुवैले आफूलाई जवान र अर्कोलाई थोत्रिएको ठान्दो रहेछ । भैगो निजी कुरा छोडौं ।

नयाँ वर्षको जादुको छडीले छोएपछि संसार विचित्रको बन्छ भन्ने लागेको थियो । दसौँ वर्षदेखि थन्किएको निर्माणाधीन पुल उस्तै थियो । बाइरोडको बाटोमा गाडीले कुदाएको धुलाको मुस्लो उस्तै देखियो । अस्पतालमा विरामीको चाप र लुटिएका गुनासा उस्तै देखिए । स्कुले उमेरका केटाकेटी फोहरका डुङ्गुरमा पलास्टिक टिप्दै गरेका भेटिए । जथाभावी फालिएका फोहरमैला, अव्यवस्थितपन आदिका कारण सहर बजारको कुरूपता उस्तै देखियो । मलाई लाग्यो, मेरा आँखामै कमजोरी छ ।

कोठामा गएर समाचार हेरेँ । सत्ताको दाउपेच अझ पेचिलो बन्दै गएको छ । भष्टाचारका फाइल खोल्ने र बन्द गर्ने उपक्रम जारी छ । मिटर ब्याजीका कथा र बेथाहरू झनझन् बल्झिँदै गए । गृहमन्त्री नै ठगी प्रकरणमा अल्झिदै गए । उसै गरी बेलाबेलामा ब्युतिन्छन्; वाइड बोडी, लाउडा, ओम्नी, शितल निवास, बालुवाटार, भुटानी शरणार्थी, चिनियाँ सुन, बलत्कार , हत्या आरोप र ठगी काण्डका भूतहरू ।

यता सामाजिक सञ्जालमा नयाँ वर्षको बोक्रो शुभकामना प्रकट गर्नेहरूको भ्याइनभ्याई पनि देखियो । उत्तरोत्तर प्रगतिको कामना अरे । कामको नाममा सिन्को सार्न नपर्ने त्यसै हुन्छ प्रगति ? पहिले बानी सुधारौं काम गर्ने । तब मात्रै प्रगतिका कुरा हुन्छन् । कुरा खाएर पेट भरिने भए अन्न खानु पर्दैनथ्यो । शब्दका शुभकामनाले मात्रै सुधार हुने भए यतिका वर्ष किन सुधार भएन ? धेरैबेर घोत्लिएँ । यी त सब भन्ने कुरा न हुन् ।

नयाँ वर्ष न हो रमाइलो त गर्नै पर्छ । म त लागेँ डबका हान्नतिर । अँ साँच्चै झण्डै भुलेको । जाँदा जाँदै सबै डबके साथीहरूमा पनि शुभकामना छ । डबका कसम खाएर भन्छु । गापसे, मापसे, हुकसे लगायतका सबै झोले, टोले र खोले साथीहरूमा पनि शुभकामना ।

फेरि पनि दोहोर्‍याएर भन्छुः विगतमा जस्तै चोर गुण्डा, ठग, फटाहा सबैका इच्छा पूरा गर्न नयाँ वर्ष सफल रहोस् । देश रित्तिए चिन्ता छैन । नेताहरू उथलपुथल पार्नमा सक्षम रहून् । वर्ष दिनमा सरकारहरू ढलिरहून् । बनिरहूँन् । धेरै भन्दा धेरैले सत्ताको स्वाद लिन सकून् ।
नयाँ वर्षको शुभकामना ।

०००
रेसुङ्गा न पा २, गुल्मी