पी पी काेइरालाआत्मा
ऊ झसङ्ग हुँदै ब्युँझियो । दिउँसै ऐंठन पो भएछ । अनि छक्क पर्दै उसले मनमनै सोच्यो, “सायद सत्यबाटो हिँडाउँने यही असल मनलाई पो आत्मा भन्दा रैछन् क्यारे !”
पी पी कोइराला :
“थुक्क गधा !” कतै बाट गाली गरेको आवाज आयो ।
ऊ झस्क्यो । यताउता हेर्दै उसले भन्यो, “मलाई को गाली गर्छ हँ ?”
“थुक्क गोरु !” फेरि गालीको आवाज आयो । उसले चारैतिर फनफनी घुमेर हेर्यो । कोही देखेन ।
“बेइमान ! तेरो दाँतसाँत झार्दिउँ ?” झनै ठूलो आवाजमा गाली वर्षन थाल्यो ।
एकै छिनमा झन अचम्म हुन थाल्यो । एउटा हातले उसको कपाल तान्यो । अर्को हातले उसको निधारमा मुक्का पनि हान्यो । अनि फेरि ठूलो आवाज आयो, “बल्ल आज भेट्टाइस दण्ड !”
“एकान्त बाटोमा प्रेतात्माले पो सताको हो कि” भनेर ऊ ठम्याउन खोज्दै थियो तर तुरुन्तै फेरि आवाज आयो, “तेरो बदमास मनलाई ठेगान लाउन म तेरै असल मन अघि सरेको हुँ, किन अलमलिन्छस, पापी ?”
ऊ झसङ्ग हुँदै ब्युँझियो । दिउँसै ऐंठन पो भएछ । अनि छक्क पर्दै उसले मनमनै सोच्यो, “सायद सत्यबाटो हिँडाउँने यही असल मनलाई पो आत्मा भन्दा रैछन् क्यारे !”
०००
धरान, सुनसरी
