नेपाली हास्यव्यङ्ग्य अनलाइन पत्रिका

मनीषकुमार शर्मा ‘समित’ :

“यो मैले ल्याएको हो ।” – पहिलो पात्र
“ई… हुन्छ तैँले ल्याएको । कति सजिलै भन्न सकेको हँ, मैले ल्याएको भनेर ?” लोप्पा खुवाउँदै दोस्रो पात्र कुर्लियो ।
दुई पात्रहरूको पाखुरा सुर्कासुर्कीमा तेस्रो पात्रको चर्को स्वर आयो –
“कसले ल्याएको रे ? लाज छैन तिमीहरूलाई ? के धाक लगाउँछौ ? मैले दुःख गरेर ल्याउँदा त तिमीहरू सुतेर बसेका थियौ । मसँग त प्रमाण नै छ । हेर्छौ प्रमाण, ल हेर ।”
प्रमाण स्वरूप तेस्रो पात्रले आफ्नो हात देखायो । हातमा लागेको रगतको टाटो अझ सुकेको थिएन । तीनै जानाको चर्काचर्कीले लामो र उग्ररूप लिन थाल्यो ।
उता उनीहरूले ‘मैले ल्याएँ’ भनेर दावी गरेको बिउ ढुसी आएर दूषित र दुर्गन्धित हुँदै थियो ।

०००
मध्यपुर ठिमी, भक्तपुर