नेपाली हास्यव्यङ्ग्य अनलाइन पत्रिका

लक्ष्मी रिजाल :

“पण्डितजी, पिण्ड चढाउनु पर्छ, कृपा गरेर श्राद्ध सम्पन्न गरिदिनुहोस् ।” यजमानको आग्रहले पण्डितको निधार खुम्चियो ।
“ठीक छ, कितापले बाटो देखाउँछ ।” पण्डितले आत्मविश्वासले भने ।

श्राद्ध सुरु भयो । किताप पल्टाउँदै मन्त्र पढ्दै गर्दा उनले ठोकर पाए- “पिण्डस्योपरि मूत्रं दद्यात् ।”
उनको अनुहार फत्रक्क भयो । श्रद्धा र श्लोकको अर्थ मिलाउन उनले बाटो खोजे । तुरुन्तै जुक्ति निकाल्दै भने, “गाईको गहुँत पवित्र हुन्छ, त्यही हाल्नुपर्छ ।”

यजमानले अवाक हुँदै आज्ञा माने । श्राद्ध सम्पन्न भयो । तर पण्डितको मनमा असन्तोष बाँकी थियो ।
“ज्ञानको बुई चढेर जुक्ति दिन सकिन्छ, तर श्रद्धामा चोट पर्‍यो भने के गर्ने ?” पण्डितले गहिरो सास फेर्दै सोच्न थाले ।

पछि थाहा भयो, छपाइ त्रुटिले ‘सूत्रम्’लाई ‘मूत्रम्’ बनाएको रहेछ ।

०००
२०८१ माघ ६ गते ।
कञ्चनरूप- १२, प्रगतिटोल, रूपनगर, सप्तरी ।