नेपाली हास्यव्यङ्ग्य अनलाइन पत्रिका

सुरेशकुमार पाण्डे :

“मित्र भोलि गणतन्त्र दिवसको कार्यक्रम छ पाल्नुहोला है !”-सभासद श्यामलालले रामलाललाई प्रचारकै क्रममा भने।
उनीहरू पुराना मित्र पार्टी छुट्टाछुट्टै भए पनि सँगसँगै जनआन्दोलनमा कुदेका मध्य हुन्।

“के कार्यक्रम राख्नु भएको छ र सरले ?”-रामलालले निदार खुम्चाउँदै सोधे।
“के राख्नु भएको छ नभन्नोस् बरू के राखेका छौँ भन्नोस्। यो सबै गणतन्त्रवादीहरूको साझा कार्यक्रम हो। हजुरहरूका नेताहरू पनि आउँछन्।”-श्यामलालले मुस्कुराउँदै भन्यो।
“के हाम्रा के हजुरका सबै उस्तै त छन् । काले काले मिलेर खाउँ भाले !”- रामलालले नाक मुख बिगार्दै भन्यो।
“के भनेको त्यस्तो ?”-श्यामलाल ठटौले पारामा सोध्यो।

“भ्रष्टाचारले सिमा नागि सक्यो सभासद मन्त्रीहरूलाई थाहानै छैन।” पेटीमा बसेका हजुरबाले खिसि गर्दै भने।
” होइन हजुर बा कसले गर्यो ? भ्रष्टाचार हामिले गरेका छैनौ क्यारे ।बरू हजुरलाई अठ्ठारौँ गणतन्त्र दिवसको शुभकामना छ।” श्यामलालले हजुर बासँग आसिर्वाद लिँदै भन्यो।

“बाँचि रहे बाबु । भाग्यमानी भए ! तर फेरि जितेर संसद मन्त्री भए भनेर आसिक भने दिंदैन।”-असी वर्षिय हजुरबा ज्ञानचन्दले श्यामलालको टाउकोमा हात राख्दै भने।
“ए हजुर बा पनि। कस्तो सबैले भ्रष्टाचार -भ्रष्टाचार भयो नै भनेको” -श्यामलाल खिसिक्क हाँस्यो।
“होइन सरकारी क्षेत्रमा त जताततै भ्रष्टाचार भएकै छ सर !” रामलालले सभासदलाई जानकारी गराए।

“कस्तो आफ्नै कुरा ! यो गणतन्त्र सबैको लागि हो । हजुरले बिरोध गर्न पाउँनु भयो। .. हो ! उनीहरूले पनि भ्रष्टाचार गर्न पाए ! त्यही भन्न खोजेका त हौला नि बाबुले ?” ज्ञानचन्दले श्यामलालको कुरा बिचैमा काटे र प्याच भने।

०००
घोराही- १८, दाङ
१४-०२-२०८२