नेपाली हास्यव्यङ्ग्य अनलाइन पत्रिका

सीताराम नेपाल :

मयुर नाचेको सबैलाई मनपर्छ । सबैले मनोरञ्जन लिन्छन् मयुरको नाच हेरेर । कागलाई चाहि डाह लागेछ ।

आफूलाई कसैले राम्रो नभनेको रिस पनि रहेछ कागलाई । तर काग चलाख । उसले आफू पनि मयुरजस्तै लोकप्रिय हुन पाए धेरै फाइदा हुन्थ्यो भनेर सोच्न थालेछ । एकदिन उसलाई एउटा जुक्ति फुरेछ ।

नाच्दा भुइँमा झरेका मयुरका प्वाँखहरू बटुलेर कागले लगाएछ र उर्दी जारी गरेछ -“यो जङ्गलमा अब जुनसुकै बेला पनि मयुर नाच्ने छ । तर जुनसुकै बेला पनि नाच्ने मयुरका वरपर अरू मयुरहरूले थपडी बजाउनु पर्नेछ । थपडी बजाउन नआउने मयुरलाई देश निकाला गर्न बनका राजा तयार हुनुपर्छ । सुचकका कुरा सुनेर राजा दङ्ग परेछन् र शर्त मानेछन् । राजाले मयुरहरूलाई थपडी बजाएर नाच्ने मयुरलाई साथ दिन आदेश गरे छन् ।

-“हे उल्का अचम्म के हुन लाग्यो ?”भनेर मयुरहरू थपडी बजाउन तयार भएछन् । नाच हेर्न सबै चराचुरुङ्गी जम्मा भएछन् । नक्कली मयुरले नाच्न जानेन । यस्तो पनि नाच हुन्छ भनेर सबैले हुटिङ गरे । राजा पनि रिसाए । नक्कली मयुर डरायो तर ऊ चलाख । उसले राजालाई बिन्ती गर्यो

-“सरकार ! मैले विदेशी विश्वविद्यालयमा सिकेको विदेशी ब्रान्डको नाच हो यो । विदेशमा त यो नाच प्रख्यात छ । यहाँ पहिलोपटक देखिएकोले नौलो लागेको हो सरकार ! पछि बानी परेपछि यही नाच सबैलाई मनपर्ने हुन्छ ।”

-“विदेशी नाच । लोकप्रिय ! विदेश र विदेशीलाई मनपर्ने ।” नक्कली मयुरको यो भनाइ सम्झेर राजाले उसको ढङ्ग न रङ्गको नाच निरन्तर देखाउने आदेश गरेछन् ।

०००
काठमाडाैं